Glac páirt sa chómhrá domhanda ar líne ó 21 go 25 Deireadh Fómhair!
Tá lúcháir ar Chonradh na Gaeilge agus Fondúireacht Ollscoile Éireann Cheanada (ICUF) a fhógairt go bhfuil dhá fheachtas mhóra Gaeilge—#TrasnanadTonnta agus Comhrá—ag teacht le chéile do cheiliúradh domhanda ar an nGaeilge ó 21 go 25 Deireadh Fómhair. Beidh sé ina ócáid chumhachtach do chainteoirí Gaeilge de gach cumas, sa bhaile agus thar lear.
Is gluaiseacht idirnáisiúnta é #TrasnanadTonnta a spreagann daoine chun úsáid a bhaint as an teanga len iad féin a chur in iúl ar na meáin shóisialta, ag nascadh cainteoirí ó ar fud an domhain. I mbliana tá #TrasnanadTonnta ag dul i gcomhar le Comhrá, comhrá leanúnach Gaeilge ar líne a thug pobail, scoileanna, clubanna CLG, stáisiúin raidió agus go leor eile le chéile ó 2013. Beidh ócáid na bliana seo ina cheiliúradh domhanda ar an nGaeilge.
Is féidir le rannpháirtithe tnúth le réimse leathan imeachtaí ar líne, comórtais, agus deiseanna chun teagmháil a dhéanamh le Gaeilgeoirí ó cheann ceann na cruinne. Cibé an cainteoir líofa thú nó díreach tosaithe ar do thuras leis an teanga, cuireann #TrasnanadTonnta spás fáiltiúil ar fáil chun do ghrá don Ghaeilge a cheiliúradh agus a roinnt.
Spreagtar gach duine lena scéal a insint, cibé acu trí phoist a roinnt ar na meáin shóisialta i nGaeilge, páirt a ghlacadh in imeachtaí, nó páirt a ghlacadh sa chomhrá. Léiríonn an chomhiarracht seo láidreacht phobal na Gaeilge ar fud an domhain agus an tábhacht a bhaineann lenár dteanga agus ár gcultúr a cheiliúradh.
Dúirt Paula Melvin, Uachtarán Chonradh na Gaeilge:
"Le Comhrá agus #TrasnanadTonnta ag teacht le chéile i mbliana tugann sé deis do chraobhacha agus baill Conradh na Gaeilge ar fud an domhain a scéal faoin nGaeilge a insint. Molaim go mór na grúpaí fud fad an oileáin agus an domhain a bhíonn ag plé le cur chun cinn na Gaeilge gach aon lá. Tá súil agam go mbeidh deis acu ar fad páirt a ghlacadh in #TrasnanadTonnta i mbliana."
Ag labhairt faoin bhfeachtas, dúirt Orlaith Nic Ghearailt, Conradh na Gaeilge:
“Tá an-áthas orainn #TrasnanadTonnta agus Comhrá a fheiceáil ag teacht le chéile i mbliana, ag aontú cainteoirí Gaeilge ó gach cearn den domhan. Cruthaíonn an comhoibriú seo deis uathúil do dhaoine dul i ngleic leis an teanga ar bhealaí cruthaitheacha agus saibhreas phobal na Gaeilge a cheiliúradh”
Dúirt James Kelly Príomhoifigeach Feidhmiúcháin, ICUF:
“ Tá ICUF an-sásta a bheith ag obair le Conradh na Gaeilge don fheachtas #TrasnanadTonnta i mbliana. Beidh an feachtas ar líne leis an nGaeilge a cheiliúradh in Éirinn agus ar fud an domhain. Is féidir le daoine le pé Gaeilge atá acu páirt a ghlacadh agus tá súil againn go mbeidh go leor daoine ag úsáid a gcuid Gaeilge ag insint a scéalta le linn #TrasnanadTonnta.”
Maoinithe ag Foras na Gaeilge agus an Roinn Turasóireachta, Cultúir, Ealaíon, Gaeltachta, Spóirt agus Meán.
TEAGMHÁIL:
Orlaith Nic Ghearailt, Bainisteoir Feachtais Feasachta
+353857759639 |
6 Sráid Fhearchair, BÁC2
Kate Ní Dhúbhlaoich,Feidhmeannach Cumarsáide
+353 87 389 8255 |
6 Sráid Fhearchair, BÁC2
AR LÍNE: X @cnag / Instagram @cnagaeilge / #TrasnanadTonnta
NÓTA DON EAGARTHÓIR:
Is é Conradh na Gaeilge fóram daonlathach phobal na Gaeilge. Tá níos mó ná 200 craobh agus an iliomad ball aonair ag an gConradh ar fud na cruinne, baill a bhíonn ag saothrú chun úsáid na teanga a chur chun cinn ina gceantar féin. Is í príomhaidhm na heagraíochta an Ghaeilge a spreagadh mar ghnáth-theanga labhartha na hÉireann. Bhunaigh Dubhghlas de hÍde, Eoin Mac Néill, agus comhghleacaithe leo Conradh na Gaeilge ar 31 Iúil 1893. Tá idir ranganna Gaeilge; abhcóideacht ar son chearta teanga; fheachtais feasachta; Seachtain na Gaeilge; PEIG.ie, lárphointe eolais don Ghaeilge; An Siopa Leabhar; thacaíocht do Raidió Rí-Rá; agus eile ar bun ag an eagraíocht ó shin i leith. Tuilleadh eolais: www.cnag.ie
