Skip to main content

Polasaí Náisiúnta don Phleanáil Tithíochta sa Ghaeltacht

Posted in Feachtais Eile.

Feictear sna figiúirí Daonáirimh is déanaí a bhfuil teacht orthu, Daonáireamh 2022, go bhfuil creimeadh leanúnach ag tarlúint do labhairt na Gaeilge sa Ghaeltacht:

Tuairiscíodh i nDaonáireamh 2016 go raibh Gaeilge labhartha ag 66.3% de na daoine a raibh cónaí orthu i Limistéir Ghaeltachta an bhliain sin. As na daoine a raibh Gaeilge acu sna limistéir Ghaeltachta i 2016, ba chainteoirí laethúla iad 20,586 duine. Is ionann é seo agus laghdú 11.2% ar líon na gcainteoirí laethúla a bhí sa Ghaeltacht i nDaonáireamh 2011 (23,175). Thit sé sin arís go 20,261 i nDaonáireamh 2022.

Tá tionchar suntasach le himirt ag cúrsaí pleanála agus forbartha ar inmharthanacht na Gaeilge mar theanga labharta phobail sa Ghaeltacht. Bíonn deacrachtaí móra ag daoine áitiúla cead pleanála a fháil chun a dtithe féin a thógaint sa Ghaeltacht. Is beag soláthar tithe sóisialta atá ar fáil sa Ghaeltacht, agus tá praghas na dtithe atá ar díol á mbrú in airde i gcónaí, go hiondúil toisc go mbíonn an-éileamh orthu ó phobail lasmuigh den Ghaeltacht – a fhágann nach bhfuil sé d’acmhainn ag muintir na háite na tithe atá ar fáil a cheannach. Ceal polasaí náisiúnta do thithíocht sa Ghaeltacht, ceal srian ar fhorbairtí sa Ghaeltacht gan choinníollacha teanga, ceal forálacha láidre sa reachtaíocht, leanfar leis an gcreimeadh ar an nGaeilge sa Ghaeltacht ar bhonn sistéamach.

Ba chóir go mbeadh pleanáil tithíochta sa Ghaeltacht dírithe ina hiomláine ar bhuanú agus neartú phobail na Gaeltachta.

Léigh na moltaí anseo →

Cén buntáiste a bheadh le Polasaí Náisiúnta do Phleanáil Tithíochta sa Ghaeltacht?

Cinnteacht do phobal na Gaeltachta

  • An cur chuige céanna in úsáid i ngach contae Gaeltachta

Cinnteacht do na hÚdaráis Áitiúla

  • Polasaí comónta i ngach contae a bhfuil ceantar Gaeltachta lonnaithe ann
  • Riachtanais na Gaeltachta aitheanta go foirmiúil sa pholasaí pleanála tithíochta
  • Polasaí a bheidh ag tacú leis na pleananna teanga i ngach limistéar Gaeltachta

Cinnteacht d’fhorbróirí

  • Eolas cruinn ag forbróirí i ngach limistéar Gaeltachta
  • Sábháil airgid agus ama d’fhorbróirí trí gan a bheith ag plé le scéimeanna nach bhfuil ag teacht leis an bpolasaí náisiúnta, i gcomparáid leis an gcóras reatha ad hoc a chríochnaíonn go minic os comhair an Bhoird Pleanála nó sna cúirteanna

Deis cur le pobal na Gaeltachta agus stop a chur leis an mbánú tuaithe Gaeltachta

  • Cuirfear in athuair leis an líon de phobal na Gaeltachta atá ina gcónaí ina bpobal féin
  • Tabharfar deis do chainteoirí Gaeilge bogadh chun cónaí sa Ghaeltacht
  • Cuirfear leis an ngeilleagar áitiúil agus le forbairt gheilleagar na Gaeltachta

Léigh ár moltaí do Phleanáil Tithíochta sa Ghaeltacht sa cháipéis iomlán anseo →

Conradh na Gaeilge

66 Sráid Camden Íochtarach, Baile Átha Cliath 2 D02 X201
Fón: +353 (0) 1 475 7401, Rphost: Tá an seoladh ríomhphoist seo á chosaint ó róbait thurscair. Tá ort JavaScript a chumasú le hamharc air.