Eolas á sholáthar ag Conradh na Gaeilge don phobal maidir le seasamh na n-iarrthóirí olltoghcháin ar chúrsaí Gaeilge & Gaeltachta trí #GaelVóta
Tá gach páirtí polaitíochta agus iarrthóir olltoghcháin ó dheas a thug tacaíocht oifigiúil do trí mhóréileamh phobal na Gaeilge agus na Gaeltachta go dtí seo foilsithe ar shuíomh Chonradh na Gaeilge ar www.cnag.ie/gaelvota mar chuid den fheachtas #GaelVóta, ach tá am fós ag iarrthóirí agus ag páirtithe a dtacaíocht a thabhairt do na héilimh roimh an olltoghchán ó dheas Dé hAoine, 26 Feabhra 2016.
Is iad Fianna Fáil, Sinn Féin, An Comhaontas Frith-Dhéine, agus Pobal Roimh Bhrabús na páirtithe a thacaigh go hoifigiúil leis na héilimh mar pháirtí ina n-iomláine, ach tá na tagairtí don Ghaeilge agus don Ghaeltacht i bhforógraí na bpáirtithe polaitíochta eile ar fáil ó www.cnag.ie/gaelvota leis.
Dúirt Julian de Spáinn, Ard-Rúnaí Chonradh na Gaeilge:
“Tá gach iarrthóir aonair a thacaíonn go hoifigiúil leis na héilimh luaite leis an bhfeachtas #GaelVóta freisin, agus is féidir le páirtí nó le hiarrthóir ar bith teagmháil a dhéanamh le Conradh na Gaeilge ag
Is feachtas é #GaelVóta chun an pobal a chur ar an eolas faoi sheasamh na n-iarrthóirí agus na bpáirtithe i dtaca le cúrsaí teanga roimh an olltoghchán ó dheas Dé hAoine, 26 Feabhra 2016, agus roimh an olltoghchán ó thuaidh i mí na Bealtaine. Trí mhóréileamh phobal na Gaeilge agus na Gaeltachta atá mar bhunús an fheachtais #GaelVóta, éilimh a eascraíonn as plean ionadaíochta agus bearta ionadaíochta arna aontú ag breis ‘s 80 grúpa pobail Gaeilge agus Gaeltachta:
- Go ndéanfaí infheistíocht €18 milliúin sa bhreis i bplean phobal na Gaeilge agus na Gaeltachta le borradh a chur faoi úsáid na Gaeilge agus le 1,175+ post nua a chruthú
- Go gceapfaí Aire Sinsearach don Ghaeilge agus don Ghaeltacht, le Gaeilge, chun go mbeadh ionchur ag an nGaeilge ag Bord an Rialtais
- Go mbunófaí Comhchoiste Oireachtais seasta don Ghaeilge agus don Ghaeltacht ar comhchéim leis na Comhchoistí Oireachtais eile
Dúirt Cóilín Ó Cearbhaill, Uachtarán Chonradh na Gaeilge:
“Tá Conradh na Gaeilge ag iarraidh ar vótálaithe áitiúla – iad siúd atá ina gcainteoirí líofa Gaeilge, iad siúd atá ag foghlaim na teanga, nó go deimhin iad siúd le bá ar bith don teanga – chun na héilimh seo a chur chun cinn leis na hiarrthóirí ar fad atá ag seasamh sna toghcheantair s’acu.”
D’oibrigh Conradh na Gaeilge i gcomhar le grúpaí pobail áitiúla ar fud na tíre chun fóraim ghnímh áitiúla a reáchtáil i 25 chontae in Éirinn go dtí seo mar chuid den fheachtas #GaelVóta, agus rinneadh teagmháil le gach iarrthóir maidir le héilimh phobal na Gaeilge agus na Gaeltachta ar a laghad faoi dhó de réir na sonraí teagmhála a cuireadh ar fáil go poiblí. Tá freagraí na n-iarrthóirí agus na bpáirtithe ar www.cnag.ie/gaelvota.