Athsheoladh an Cheannárais

Déanfaidh an tAire Gnóthaí Pobail, Tuaithe agus Gaeltachta, Éamon Ó Cuív, TD, Ceann-Áras stairiúil Chonradh na Gaeilge in Uimhir a Sé, Sráid Fhearchair, Baile Átha Cliath 2 a athsheoladh i ndiaidh deisiúchán déanta air le gairid Dé Máirt, 23 Feabhra 2010, ag 6.00in.

Ócáid cheiliúrtha a bheas in athsheoladh Ard-Oifig Chonradh na Gaeilge, áit go mbeidh an foirgneamh ar fad ar oscailt don phobal óna 4.30 - 6.30in le deis a thabhairt do dhaoine amharc ar an áras athchóirithe agus turas treoraithe a ghlacadh le foghlaim faoin bpáirt ríthábhachtach a bhí aige sa troid ar son neamhspleáchas na Poblachta a bhaint amach.

Bhí ceangail ag cuid de na daoine is tábhachtaí in Éirí Amach na Cásca 1916 leis an gConradh agus leis an áras in Uimhir a 6 Sráid Fhearchair; ba bhall de Chonradh na Gaeilge iad seisear as an seachtar a shínigh Forfhógra na Saoirse, agus tá an tollán inár éalaigh a leithéid de Mhicheál Ó Coileáin agus baill eile de cheannasaíocht an IRB ó fhórsaí na Breataine le feiceáil fós faoi Cheann-Áras an Chonartha. Ní hamháin gur bunaíodh an chéad Aireacht Airgid faoin Saorstát sa Cheann-Áras freisin, ach bhíodh Banc Shinn Féin lonnaithe in Uimhir a Sé le linn Chogadh na Saoirse agus is as an bhfoirgneamh céanna a fógraíodh torthaí na dtoghchán in 1918.

Fuair Conradh na Gaeilge maoiniú de €238,186 tríd an Roinn Gnóthaí Pobail, Tuaithe agus Gaeltachta ó Chiste na Gaeilge, atá páirt-mhaoinithe ag an gCrannchur Náisiúnta, le cabhrú leis an áras stairiúil i mBaile Átha Cliath a dheisiú. Fuair an Conradh síntiúis flaithiúla ó chraobhacha na heagraíochta le híoc as cuid eile de na deisiúcháin freisin agus beimid i mbun breise airgid a bhailiú go luath leis na costais iomláin ag seasamh amach a ghlanadh.

Arsa Pádraig Mac Fhearghusa, Uachtarán Chonradh na Gaeilge: "Thar cheann Chonradh na Gaeilge, ba mhaith liom buíochas ó chroí a ghlacadh leis an Roinn Gnóthaí Pobail, Tuaithe agus Gaeltachta agus le craobhacha uile an Chonartha go dtí seo a chabhraigh linn caoi a chur ar an gCeann-Áras ag Uimhir a Sé trí shíntiúis flaithiúla a chur i gciste na ndeisiúchán. Is mór ag an gConradh freisin go bhfuil an tAire Éamon Ó Cuív leis an gCeann-Áras rístairiúil seo a athsheoladh dúinn, nuair a chabhraigh síntiús a Ranna chomh mór sin leis na deisiúcháin riachtanacha a chur i gcrích."

Beidh ceol agus sólaistí ar fáil sa Chlub san íoslach i ndiaidh athsheoladh oifigiúil an Cheann-Árais leis an Aire Ó Cuív, mar aon le seastán eolais ag gach eagraíocht atá lonnaithe sa bhfoirgneamh ar taispeáint - Conradh na Gaeilge, Ógras, An tOireachtas, Seachtain na Gaeilge, An Siopa Leabhar, Club Chonradh na Gaeilge, Raidió Rí-Rá, Rith 2010, an tIonad Saor-Chomhairle Dlí agus Glór na nGael Laighean san áireamh.

Deir Julian de Spáinn, Ard-Rúnaí an Chonartha: "Is fóram daonlathach phobal na Gaeilge é Conradh na Gaeilge agus tá an eagraíocht tugtha don chomhoibriú le heagrais Ghaeilge eile leis an teanga a chur chun cinn ar fud an oileáin. Is deis iontach í athsheoladh Cheann-Áras an Chonartha le toradh an chomhoibrithe leanúnaigh sin a cheiliúradh ‘s muid ag súil leis an bhfoirgneamh a fhorbairt mar lárionad na Gaeilge sa phríomhchathair d'imeachtaí, comhdhálacha, ranganna, srl."

TUILLEADH EOLAIS & ÁIRITHINTÍ:

Brenda Ní Ghairbhí,
Feidhmeannach Oifige, Conradh na Gaeilge.
01 4757401 / Tá an seoladh ríomhphoist seo á chosaint ó róbait thurscair. Tá ort JavaScript a chumasú le hamharc air. / 086 3649776

Julian de Spáinn,
Ard-Rúnaí, Conradh na Gaeilge.
01 4757401 / Tá an seoladh ríomhphoist seo á chosaint ó róbait thurscair. Tá ort JavaScript a chumasú le hamharc air. / 086 8142757

Eagraíochtaí faoi scáth Chonradh na Gaeilge