Is géarchéim chórasach, náisiúnta í an ghéarchéim tithíochta atá ag réabadh na tíre seo le tamall de bhlianta anuas ach tá castacht sa bhreis ar an scéal sa Ghaeltacht mar a bhfuil todhchaí ár dteanga á cur i mbaol ag an gcóras reatha: córas atá ag cur muintir na Gaeltachta as a gceantair dhúchais mar gheall nach féidir teach a cheannach, a thógaint nó a fháil ar cíos go fadtéarmach.

Tá daoine aonair, grúpaí pobail, feachtais áitiúla agus eagraíochtaí náisiúnta ag treabhadh sa ghort seo le fada ag iarraidh réiteach a fháil ar an ngéarchéim tithíochta Ghaeltachta, ach bhí sé soiléir go raibh sé thar am an obair seo a tharraingt le chéile faoi ghluaiseacht náisiúnta, phobalbhunaithe amháin. As an gcomhthéacs seo a d’eascair TINTEÁN, feachtas fréamhaithe sna ceantair Ghaeltachta áitiúla, agus iad seasta le chéile d’aon ghuth.